ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានបើកកិច្ចប្រជុំពិភាក្សាលើការដំឡើងប្រាក់ឈ្នួលអប្បបរមាសម្រាប់ឆ្នាំ២០២៤ របស់កម្មករកម្មការិនីនិយោជិតផ្នែកវាយនភណ្ឌ កាត់ដេរ ផលិតស្បែកជើង ផលិតផលិតផលធ្វើដំណើរ និងកាបូបជាលើកទី៣នៅព្រឹកថ្ងៃទី០៤ ខែកញ្ញា ឆ្នាំ២០២៣ ដោយលទ្ធផលតំណាងភាគីកម្មករនិយោតបានស្នើឱ្យដំឡើងត្រឹម ២១៥ដុល្លារ ខណៈភាគីខាងនិយោជកឱ្យត្រឹម ២០១ដុល្លារក្នុងមួយខែ។
កិច្ចប្រជុំជាលើកទី៣នេះធ្វើឡើងក្រោមអធិបតីភាពរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ ដោយភាគីខាងសហជីព និងតំណាងភាគីនិយោជក បានបន្តលើកហេតុផល និងបង្ហាញនូវគោលជំហរផ្ទៃក្នុងរបស់ខ្លួនប្រកបដោយវិជ្ជាជីវៈ និងមានភាពចាស់ទុំ។
កិច្ចពិភាក្សាគ្នានៅថ្ងៃចន្ទនេះមិនទាន់នឹងទាន់ជោគជ័យនៅឡើយទេ ខណៈកិច្ចប្រជុំនេះនឹងបន្តធ្វើឱ្យបានមុនពិធីបុណ្យភ្ជុំបិណ្ឌមកដល់តាមប្រសាសន៍របស់នាយករដ្ឋមន្ត្រីកម្ពុជា សម្តេចមហាបវរធិបតី ហ៊ុន ម៉ាណែត ក្នុងពិធីសំណេះសំណាលជាមួយកម្មករកម្មការិនីរោងចក្រនៅក្រុងតាខ្មៅកាលពីថ្ងៃទី២៩ ខែសីហា ឆ្នាំ២០២៣។
គូសបញ្ជាក់ថា នៅក្នុង២០២៣នេះ ប្រាក់ឈ្នួលអប្បបរមារបស់កម្មករនិយោជិតក្នុងវិស័យវាយនភណ្ឌ កាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរនិងកាបូប មានចំនួន ២០០ដុល្លារក្នុងមួយខែ ប្រសិនបើបូកនឹងប្រាក់អត្ថប្រយោជន៍ផ្សេងៗបន្ថែមទៀត កម្មករនិយោជិតម្នាក់អាចទទួលបានប្រាក់ឈ្នួលចន្លោះពី ២១៧ ទៅ២២៨ដុល្លារក្នុងមួយខែ៕
